لقاء وليد العلي في كواليس برنامجه (وسايد سهر) عند لقائه بالشاعر فهد المساعد على مكس اف ام

لقاء وليد العلي في كواليس برنامجه (وسايد سهر) عند لقائه بالشاعر فهد المساعد على مكس اف ام

مذيع متألق بصوته الشجي والذي يجبرك على أن تكمل الإستماع إلى برنامجه
دون أن تشعر بالملل ..
وليد العلي .. مذيع برنامج ( وسائد سهر ) في إذاعة مكس إف أم
في الأسبوع الماضي كان يستجوب شاعرنا فهد المساعد
واليوم هو هنا ليجب على اسئلتنا ..
رغم رفضه المؤقت لإجراء أي حوار
إلا أنه لم يبخل علينا وكان حاضرا ً رغم انشغاله
اترككم مع هذه الدردشة الخاصة والحصرية لقسم كواليس
عن كواليس لقاء فهد المساعد في برنامج وسائد سهر

بداية اخوي وليد مسا الخير والله يعطيك العافية  لأنك استطعت انك تحضر فهد بعد
انقطاع قصير عن عشاقه

مساء النور عليك حبيبي وكل اعضاء منتديات الشاعر فهد المساعد ..

/

ـ انا هنا ماراح اطيل عليك بالحوار والأسئلة لكن هي مجرد استفهامات ودردشة
خفيفه ابطالها جمهور المنتدى جاهز ننطلق

اوكي جاهز ..

/

ـ عندي عتب بس قبل ما ابدأ بالعتب راح اوصل لك تحيات كل عشاق وأشقاء روح
فهد المساعد وليد نعتب عليكم بسبب موقع الإذاعة على الويب سايت كان يفصل في
كل مره تسبق دخول اغنيه !!

حبيبي تحياتي لهم وبالنسبة للعتب اكيد ان الشغلة فنيه مالها علاقه بعمل المذيع أو
المعد لكن اللي أحب اقوله من خلال قول احد العاملين في مكس أف ام أن الموقع تحت
التحديث المستمر ، رغم إننا حدثنا و وسعنا القدرة الإستيعابية لعدد المستمعين
لـ اكثر من عشرة الآف مستمع باللحظة الواحده ولما يكون فيه تعليق غالبا ً مايكون
لـ اللود الكبير من المستمعين وحنا نفرح أكثر بالتعليق

/

ـ الفواصل الغنائية كانت طويله نوعا ً ما والإعلانات كذلك ما تفكرون تختزلونها
شوي او تخلون الأغاني كـ مقاطع ؟؟ لأنها تسرق من وقت الضيف ..

طويله هذي مسأله نسبية انت تحكم انها طويله غيرك يشوف انها لا أحلى لكن
بالنهاية الإذاعه لابد ما يكون فيها اغاني والأغاني جزء من المادة الإعلانية المتكاملة
( الأغاني والإعلانات واللنكات) اللي يتكلم فيها المذيع أو الضيف ولا بد من
وجود الأغاني كل ربع ساعة تقريبا ً .

ومثل مافيه مستمعين يحبون يسمعون فهد أو وليد أو اي ضيف للبرنامج فيه
مستمعين لهم الحق انهم يسمعون الأغاني فهذا جزء من المادة الإذاعية ، ممكن
اخترنا وهذي من الأسئلة اللي وصلت وقريتها هذي اختيار مين وممكن الأغاني اللي
اخترناها شوي طويله ست دقائق او سبع دقايق لكن بالعادة الأغاني تكون من اربع
إلى خمس دقائق

/

ـ اكثر من مفاجئه حضرتوها لفهد مداخلة سمو الأمير سعود ومداخلة الطفل تركي بصراحة
هل كان فهد على علم بذلك ام انكم فاجئتموه بذلك ؟؟

اكيد مو من مصلحتي ان فهد يكون يدري عن المفاجأه لأنه من صالحي دائما ً ان
التقط عفوية ردة الفعل من الضيف ( الضحكة الإبتسامه ) كل ماكانت عفويه كل
ماكانت افضل فحرصي على انها تكون عفويه أكثر شي او بأكبر قدر ممكن هو اللي
يخليني ما اعلم الضيف .

/

ـ كثير من المسجات وصلت لكم قرأتم البعض والبعض الآخر لم يسعفكم الوقت
لقراءته هل تقومون بنسخها وإرسالها للشاعر بعد البرنامج
حتى يطلع عليها ام انها تبقى في ارشيف البرنامج فقط .؟

تبقى في ارشيف البرنامج بالنسبة للي توصل من خلال الأس ام اس اكيد ما تتواجد
الا على صفحات الإذاعة اما بالنسبة لرسائل الفيس بوك اكيد انه اي واحد بإمكانه
يقراها وهذي إحدى سياساتنا إننا نكون شفافين بأكبر قدر ممكن مع المستمع
يعني وين الإذاعه اللي كانت تقرأ او تستقبل رسائل المستمعين من الأنترنت من
خلالصفحه الكل يقراها .
وبالنسبة للجملة اللي تقول ( بعض الرسائل والبعض الآخر ماقريتها ) لا مو
البعض الآخر.. ممكن فات رسالتين ثلاثه خمسه خلال الساعتين وكل رساله بظروفها يعني .

/

ـ انا كان عندي هنا سؤال بخصوص المفاجأت هل كان هناك ضيف حاولت انك تجيبه يتداخل مع فهد ولا استطعت ؟؟

مو ماقدرت بس إن التوقيت خاننا كثير ، الفنان ماجد المهندس كان احد الأسماء
المطروحه ما شاءالله ارقامه كثيره وكلها مغلقه وتواصلت معاه من خلال أحد الأصدقاء
المشتركين لكن رد علي بوقت متأخر كثير وماصار فيه وقت يكون ويانا وهو كان
مرحب كثير ..

/

ـ هناك رسائل طريفه أو غريبه تصلكم اكيد اثناء الحلقه هل تذكر لنا رسالة أو
رسالتين ؟

مو كل حلقه الا كل عشر دقايق يكون فيه رساله لها قصه طريفه او مضحكه او تزعل
او شاطحه عن الموضوع لكن اتذكر والله مااتذكر بس مافيه برنامج يخلى من هالنوع من الرسائل ..

/

ـ انا كمتابع لفهد لاحظت انك لم تتطرق نهائيا ً لكل المواضيع المستهلكه والتي تكلم
بها فهد في حوارات ولقاءات سابقه هل نقول أن وليد العلي متابع جيد للساحة
الشعرية ؟؟

إني ما اجيب مواضيع مستهلكه هذا حرصي الدائم في كل الحلقات لكن متابع جيد
للساحة الشعرية للأسف أنا للأمانه مو متابع جيد انا متابع للقصائد أكثر وأقرأ مجلة
فواصل والي اعتبرها المجله الوحيده الشعرية اللي احرص على اقتنائها دائما لكن ما
اتابع الساحة الشعرية ومحتج جداً على الوضع السيء اللي وصلت له الساحه .

/

ـ هل طلب منك فهد اسئله معينه أو رفض اسئلة معينه اثناء الحوار ؟؟

لا أبدا ً ولا أنا راح ارضى اساسا ً

/

الآن اتركك مع مداخلات اعضاء موقع فهد
من انشودة المطر مداخلتين الأولى تقول : :
ـ بلاشك أن لكل ضيف بصمة مختلفة حدثنا عن بصمة فهد وما وجدته في فهد
وحواره سواً (ايجابيات أو سلبيات )

فهد شهادتي فيه مجروحه لأني عرفته قبل البرنامج وتعرفت عليه عن قرب وجلسنا
كثير مع بعض لكن فهد لماح كثير حتى لما ترمي له بموضوع ينتبه لك
ملهم ( Good speaker ) متحدث جيد كثير ومن اجمل الشعراء اللي كانوا يلقون
القصائد .
وفيه مشكلة كثير ما تنطرح وكثير ما يتكلمون فيها المستمعين ان فيه بعض الشعراء
كثير يكتبون شعر حلو لكن لما تسمعه باللقاء تنصدم بطريقه إلقاءه للقصائد
يعني احيانا ً تحس انه مو الإحساس اللي انت كان واصل لك من قراءتها هو نفسه
لما تسمعه فبعض الشعراء مايعرف يقول قصايده لكن فهد من الشعراء الجميلين
كتابة وإلقاء وهذي ميزه طبعا ً

ـ مداخلة انشودة المطر الثانية تقول :
ما هو رأيك بأشقاء روح فهد مداخلات وتفاعل بالبرنامج ؟؟

جميلين ومن اجمل الجماهير على فكرة وانا قلت لفهد تواصل معي شعراء وكان معي
شعراء ما اقول اجملهم علشان ما اكون جاحدهم لكن اقول من أجملهم واعجبتني كثير
عفوية ( نورة عبدالله ) عفويتها بالإتصال كانت حلوه كثير وباين الحب الكبير من
جمهور فهد واتصور انه يرجع لـ اسلوب فهد للتعامل مع جماهيره ومحبينه على
اساس انهم شركاء نجاحه وهذا من الذكاء الكبير اللي يتمتع فيه فهد ومن والصفات الطيبه ...

/

لـ شاعرة المشاعر و ضي نفس التساؤل تقريبا ً يقولون :
- أخ وليد انت مذيع عملت أكثر من لقاء مع اكثر من شخصية والسؤال ماهو اكثر
شي جذبك بفهد كـ ضيف لبرنامج ؟؟

ـ لأنه شاعر جميل أولا ً يمتلك قاعدة جماهيرية ولثقتي انه راح يكون هديه حلوه
لمستمعي وسائد سهر وفهد فيه اكثر من سبب يخليه بانه يكون موجود وياك ..

/

من صدفة العمر تقول :
ـ على أي أساس تم اختيار الأغاني وهل كان لفهد دور بإختيار بعض الأغاني ؟؟

انا من عادتي احب اعطي الحرية للضيف وش تحب من الأغاني وايش الأغاني اللي
تمثل له ذكريات حلوه واحس انه لما يكون فيه اغاني يحبها الضيف راح تكون الليله
ملهمه اكثر والضيف يرتاح أكثر واحيانا ً تكون نفس الأغنية اللي نشغلها تكون
موضوع كلام بيني وبين الشاعر بعدها ممكن اسأل ليش تحبها او الأغنية من كلماتك
أو الإغنيه لها موقف وياك دفعك تكتب قصيده ..
والأغاني بعضها من اختياري والبعض الآخر من اختيار فهد ..

ـ طيب كيف تقيّم ذوق فهد بإختيار الأغاني ..؟؟

جميل فهد .. انا عندي مكتبة صوتيه خاصه بمكتبه وسائد سهر مجموعة أغاني كبيره
وكل الأغاني اللي كان يطلبها فهد كانت موجوده من ضمن المكتبه اللي انا مختارها
وهذا دليل على أن اذواقنا تتشابه ..

ـ هدايا قديمة احد المتداخلين معك ليلة البارحة يرى أنك تقرأ المسجات بسرعه على الضيف ولا تدع مجال للشاعر أن يجيب !!

كثيره المسجات ولو اترك المجال بعد كل مسج ماخلصنا الساعتين
بعدين أغلب المسجات كانت ( تحية لكم ومساء الخير) وصعب بعد كل مسج اقول
( فهد تحية لك )
لكن نقراها ونعطيهم الحق إن اسمائهم تكون متواجده معنا وبعدها اعطي فهد الحق انه
يرد عليهم وإذا فيه سؤال اسجله على جنب واطرحه على الضيف

 

 

 

 

 

 

للإطلاع على مصدر الموضوع

على هذا الرابط

 

http://www.almusa3ed.com/vb/showthread.php?t=68448

 

 

 

مكس اف ام هي كلها في المكس .....